Delima ka arimowet epwamoci atisoket: Nipara ni kaskeriten atisokana, e ici mikwian tepirak ni ka ici atisokan. Enkon peikw Kokotcew ka atisokatakaniwitc. Takon kaie Matci natowewok e atisokatakaniwitcik. Weckatc, peikw iskwew ka ki kanawerimit ki pe atisokew mocak Kokotcew atisokan. Kiapatc kaie ni atisokan nohwe.
Iskwew ohweriw ka atisokatakaniwitc. Mocak ki pa kapeciw mamo onitcanica. Omocom mocak ki matcariw e nta natohoritci. Nicw kekotc nicto kicko itonohoriw. Wircike pa tacikekopan naha iskwew mamo onitcanica kaie otema mekwatc nihe ka iciwepak.
Ki petam iskwew e pa aititewekanohonik pecotcik neta ka ici kapecitcik. Mia e mi otamitinik kekociciriw askik, ekoni e ititakonik. "Nama wiskat nihe petakon towi!" iteritam. Nama wi sekisiw, tepirak iteritam otcitakotc wiec ici petakonotike nihe, nama aric kiskeritam. Kiskeritam kitci matci iciwepasitcik, wir, onitcanica kaie otem. Pa tetipapitariw otem.
Ocimo naha iskwew aci e iti tepiskarik. Aci wewepitwaw nisawiw kitci ocimot. Erowek ki tcipakwekopan kaie ki pakwecikanikekopan ickotek. Micta micariw otciman, ekoni ici positasot, ekoni ici weripihat onitcanica minawatc weripihitiso. Wewerita ki akonohew onitcanica mamo wapowaniriw. Aci matceho. Ketin otapaham e mickat.
Nokoniw kiapatc ickoteriw warowik e pe otapatak. Nama ki otci ickwa aikew kitci actowehak osam e ki micta wewepitwat e matcat neta. Ki kickoho e ocimot naha iskwew. Mia kotc takociniw Kokotce neta ka ickwa pe matcehot. Kiciwasiw Kokotce eka e tacikaniwonik. Nama wi rarewepaham iskwew e kiskerimat Kokotce e micta nanakatcisiritci. Mickaw. Nama kekocic kotak mikwiw, tepirak mickaw.
Kek wapatam e micta pe makatewaskonik. Aci kata onimiskiskarik. Natakaham osam aci micta rotinik. Kakwepaciwok mictikok. Kek petamokopan e notakosinaniwonik. Enkon nohwe Kokotcew ka matcewepacit. Nac nama iti petakosirikopan osam e micta rotinik. Kek ki arwactaniw, aci kiwetcimew ka ici kapecit mamo onitcanica. Nama wi kapawok awacak osam e koctatcik Kokotceriw. Aci itwew iskwew onitcanica: "Kapakw, nama ni wiec. Ki matcewepaciw Kokotcew nete warowik, kice warowik!"
Ka ickwa apita kicikarik, aci pe kiweriw omocom. Kiskeritam omocom tan ka ki iciwepanik. Ki wapatam e maskanoweritci Kokotceriw kaie e ki kakwepaciniritci mictikoriw. "Tepirak Kokotce ka totak niheriw!" iteritam. Arikahikowok omocomiwaw e itwet: "Kiapatc ia ki matisinawaw?" Itwew naha iskwew: "Kecpin ki nipoiak, nama ni nta ki otci tacikatan. Erowek e ki ocimoiak, kirike eka aci kitci pe takocik naha Kokotce!". Ekote ka totak iskwew e ocimot, ki matceho mamo onitcanica.
