Nicw kice iriniwok mocak mamo ki pa tacikewapan. Shawinisiw kaie Kiwetinisiw icinikasopanak. Pakisakiriw mocak pa miwotepan Shawinisiw. Pirecica neta e araspan. Nama mocak miroparitohopanak niki kice iriniwok. Kiwetinisiw mocak wi miskamepan Shawinisiw opakisakiriw.

Ntowatc meka mirakaniwiw Shawinisiw pireriw, kwekweciriw kaie ohomisiwa. Nama tapwe tipi naheritamopan Kiwetinisiw. Aci itekopan Shawinisiw: "Ekoni ici mirerita, nipara erowek ki miritin!" "Mocak kata pipon kecpin eka tipi nipara pe mirine!" itekopan Kiwetinisiw. "Ekote, nama awacamec ki ka miritin!" itekopan Shawinisiw. Pirecica ka piponicitcik tepirak ki mirakaniwipan Kiwetinisiw.

Iskwewok aimihepanak otcockoriw: "Pwataki kir kitci pa nipain ke tipiskak, tcitcikomakan nohwe apowai!" Kekw wapamewok atikoriw e acokatakaritci. Kaskina posipitawok tcimanik e petowatcik atikoriw. Nosinehikew Shawinisiw, ekoni e oniket opakisak. Kiwetinisiw wir nama kitci nosinehikew, ekota e taciket wacakamak.

Ka wapamat Shawinisiw e posipataritci tcimanik, ekoni ka ici ntwapatak Shawinisiw opakisakiriw, ki matcicam. Pirecica ka nipinicitcik taripan pakisakik. Wawepinew meka Kiwetinisiw pirecica. Kiwetinok, wapanok kaie nakapewonok icacepinew. Kiackw nictam ki oritarakaniwiw. Kiwetinok ici wepinew. Ekoni wetci nictam naha pirecic pe nokosit e miroskamik.

Napitc nihe, nama otonipanak niki namesak kitci tepwetcik. Ekoni ka ici otapinak kinocew makomaniriw kitci kickicitisot e wi wecitamatisot ke otonit. Minawa namepar ki ickwatitiso mamo mictikoriw e piskarerik

Ekoni e witamowat namepar neriw Shawinisiw mekwatc e kimotimowakaniwit opakisak: "Aci kimotiw Kiwetinisiw kipakisakiriw!" Pe kiwetcimew meka Shawinisiw. Osam aric e ki tcitcikomakaniwiritci otapowai, ki natowapiririw. Ekoni eka wipatc e ki otci takocinik Shawinisiw. Ekoni tca wetci mocak kiwe nipik.