Weckatc pirecic e kwetcitakopanen kitci miretc, nama nac kackitakopan kitci opohotc.
Kek nikotin e ici kickapiskitinarik ki nta kwetcitaw. Eko meka atcikotc e ki wisakicik. Ki natwacimakopan otatakona. Mictahi moskopinekopan. Kinec nama otci mirwatisiw. Nama kaie awocamec ki otci miskamokopan otcicton.
Mitcet aci ickwa matcerewakopan pirecicak cawonok ka nta piponicitcik. Nama kaie aci tacikerikopan okomesa. Mictahi pa kitimakicicikopan anaha pirecic. Onawis kackitakopan e pimotetc, epitc akositc.
Kek wapamakopan mictikwa. Aci itakopan: "Tan e icinikasoin?" "Asati, nit icinikason", itikokopan anihi mictikwa."Ni nantowapaten ke taci piponician. Ki ta kanawerimin a itakopan anihi asatia."Awos matca matca, ki ka pikotan ninipicim", itikokopan anihi asatia. Ekoni e ici matcakopanen anaha pirecic, onawis kaie kackinakopan e mitapecimakopanen otatakona.
Kek wapamakopan irinatikwa. Kwetcimakopan: "Matci a ni nta ocitan ke otcictonian ota. Ni ki wisakicinin, nama tca ni ka kackitan cawonok kitci ni ta piponician.” Peikon e itikokopanen anihi irinatikwa."Awos matca matca, ki ka pikotan ninipicim kirika notikon". Micta meka matokopan anaha pirecic.
Kek, kotakihi mictikwa wapamekopan, wikwasatikwa."Tan wetci kiapatc ota pa tacikein, aci tca kaskina kotakik pirecicak e ickwa matceretcik?" itikokopan anihi wikwasatikwa. Witamowakopan e ki wisakicik. Kwetcimakopan kaie kitci ki kanawerimikotc kape pipona. "Nama ka kanawerimitin, kwecan ki ka pikotan niwikwasim, nipicima kaie notikona", itiko anihi wikwasatikwa. Ekoni ka ici matcepatatc anaha pirecic e micta iti kikimotc. Aci kaie iti porowitakopan.
Kek erotc petam e aimihakaniwitc."Tan wetci matoin? Ekoni irikik mato", itakaniwikopan. Tecikotc pekotcapohotisokopan, e tca itapitc micta icpimik, micta kinwaskosirikopan anihi mictikwa. "Awin kir?" itekopan anaha pirecic."Nin sesekatikw, cikopi icinikaso nimocom. Tante e icain?" itikokopan. "Ni nantowapatetai ke taci piponician, nama aric wiec ni wi kanawerimikowin. Nama tca ni kiskeriten ite ke icaan.
"Petcimote, nin ki ka kanawerimitin. Micta kicitew ota. Ki ka akopititin minawatc tca ki ka ocitan ke otcictoniin." Mictahi mireritam anaha pirecic. E ickwa aiketc aci micta kakisinariw. Aniki tca mictikok aka ka ki otci wi kanawerimatcik pirecica, kaskina ki pinaskiwok. Kotakihik tca, cikopi ka icinikatakaniwitcik nama wiec otci ispariwok. Eko tca ni wetci icinakok tatwaw e pitcipipok.
