Awesisak ohweriw ka atisokasotcik, e aitiwakopane mekwatc kewirowaw e iriniwatisiwakopane. Nohwe aric mia Nikikw ka atisokasot. Nohwe tca Nikikw ki matcaw. Matcetoskew.
Kek iteritam, aci ni ta ki kiwan. Niminaniwonotike so ho minawatc. Mari kicikarikopan. Ekoni tapwe ka ici kiwet.
Kek micikaw nete omikiwamiwak. Nama tariw okom. Aci iteritam, kanawapata tca ka ki itweian. Ekoni e ici matcat Icaw nete. "Niminaniwon": itakaniwiw
Tecikotc nete kiapatc neta witamowakaniwiw. "Niminaniwon:" itakaniwiw. Tapwe mote micta mirewetakaniwoniw. Ekoni e ici pitaket. Mekwatc nimiriw okom.
Ekoni e ici natawapamat neriw okom. Aci: "pe pa aitotaman e kanawapikein. Nama tca karike ki pe natawapamin e micikaian". Micta kitotew neriw okom.
"Awas ma nte ! ki kipicken:" itakaniwiw. Nte tca ici otamohwakaniwiw otitaminik, ekoni e pictohwakaniwit otonik. Micta pakickacewehwakaniwiw.
Enkweriw tca ni wetci icinakosit ka micta kispakisit otonik. Enkweriw ni ka ki itohwakaniwit e kakweritamokopane e niminaniwonik. Eko sa ni e askwak nohwe atisokan.
