Exercices à partir de textes : Maks acitc anikotcac
Max et l’écureuil
Étudiez ce qui suit
Tout jouer Maks acitc anikotcac
Maks acitc anikotcac
Peikwaw e kicepawok, ockinikicic, Maks icinikaso, nta pamotew notcimik. Kanawapatam notcimiriw e micta mirwinakonik. Micta kaie miromamew mictikwa kaie mackociriw miromatam. Natotowew pirecica e nakamoritci. Micta mirotowew. Micta mirerimo acitc micta pekatewerimo.
Esko peikwaw ki nta pamotetc notcimik, ekoni aci e totak tato kickwa anahwe Maks. Peikociniw kekociciriw mocak ka totak aka e mirwacinik. Mocak natwapitam otikoniw e tca mamanipitak nipiciriw papeikw.
Kek petowew awiriw e iteritci: "Kekwan wetci totaman?" Micta kiskimirowepariw octikwanik nac ospiskonik. Nama awiriw wapamew. Wetci pe pakiciniritci pakana octikwanik. "Aw! Ote icpimik mictikok pe itapi. Ekota ni e akosian." "Nia! Nama ni ki ka ki arimwan kir. Anikotcac maka kir." "Tan e isparik?" Iteritam Maks. "Nit iteriten a ni tepirak kekotc tapwe ni ka isparik?"
Kiapatc aimihiko nihi anikotcaca: "Kekwan wetci natwapitaman otikon?" "Nama takon ke itotiskeian. Enko ni kotc ke ki totaman. Ni sakitan ota e pe icaian, aric ni kwetowi aitoten. Kecpin tca ko e mamitoneritaman, arimatc ni ko kekocic kitci takonaman nitcitcik." "Aci ni kiwockweatisin ka taci aimihak anikotcac," iteritam Maks.
Nama tekaci mireritam anikotcac ni e totamiritci nihi ockinikicica, ka natwapitamiritci otikoniw. Nipahew ni mictikwa ni ka totak, itew. Aci itew anikotcac nihi awaca: "Awoctakocik ki ki petatin e itein e micta mirwacik notcimik. Kekwan tca wetci pikotain?"
"Nama ni kaskina ni pikotan. Tepirak otikon ni natwapiten. Kecpin kiskeritaman irikik e kowihwakaniwitcik mictikok tato kickwa kitci ki ocitakaniwok masinahikanickwemokw acitc napakatikok." "Eko maka ni wetci ititan kitci manatcitain kekocic notcimik ka takok. Kecko asani wiec ki ka iciwepisin."
Ekoni e ici pasikotc Maks e nta pamotetc. Kek pe micta rikoskon. Micta pe makatewaw osko. Aci kata matcepataw Maks. Mia kotc micta kimiwoniw. Nanake aci micta onimiskiskaw. Kek pakicin onimiskiw. Mictikwa paskisowew. Ekoni e kowiparitc anahwe mictikw. Tcicohiko nihi mictikwa anahwe Maks. Micta warawik ici pakicin. Nama erowek mictahi ki otci katcitohiko. Erowek kackitaw kitci pasikotc e tca kiwepatatc. Tecikotc otaricapimik nta kipohotiso.
E ickwa nicwo kicikarik, pe natawapamiko anikotcaca Maks. Osapwakanik pe papawohikeriw. "Ki wapaten a tca ka ititapan wiec ki ka iciwepasin." "Kekwan tca nin tepirak wetci wiec iciwepasian. Nama tca wirawaw kickihaskwe iriniwok wiec iciwepasiwok?"
