Exercices à partir de textes : Matci natowewok kicowatc ka ki paciwiritisotcik
Les Iroquois et leur sort
Étudiez ce qui suit
Tout jouer Matci natowewok kicowatc ka ki paciwiritisotcik
Matci natowewok kicowatc ka ki paciwiritisotcik
Matci natowewok ota ka atisokatakaniwitcik. Ki peikoreanimikisiwok. Ki pe icatcik ote St-Maurice sipik, e pe nta mikasotcik kaie e pe nta kimotitcik mikitakaniriw, nehirowisiw niheriw.
Apitc matci natowewok e pe takocikik, e miroskaminik kaie e takwakinik. Ekoni apitc nehirowisiwok e micta mitcetiritci omikitakaniwaw.
Mekwatc e mickatcik matci natowewok, nehirowisiwok ki kiskerimewok. Ki tca nanakatcihewok niheriw matci natoweriw. Mocak ko nitak ici matcehowokopan niki nehirowisiwok e nta ntomahatcik. Kek peikw matci natowew, ki iskwatowiw mictikok. Ekoni e kiskeritak e nosinehwakaniwitcik.
Ki keskinotowew kokokohoriw tepirak e wi witamowat okwemesa e ki kiskerimat nehirowisiwa e nosinehwikotcik. Minawatc naha peikw nehirowisiw, ki kimotc kipaw otcimanik. Ki nta natowapamew neriw ka petakosiritci, ka kitoritci. Nama warowik neta takonipan onikam.
Ki icaw neta mia ka ki ici petowat kokokohoriw. Ka iti takocit, aci wapamew matci natoweriw e taci akosiritci mictikok mekwatc e taci kitowaritci kokokohoriw.
Aci itekopan nehirowisiw : "Tekaci nama ki icinakosin kokokoho. Nitatowi!" Ki nitatowiw nohwe matci natowew.
Aci kokwetcimakaniwiw : "Tan e taciiekw? Ki mitcetinawaw ia? Tanta mia e ici kipeciiekw?" Aci itwekopan nohwe matci natowew : "Nama ni mitcetinan. Nama kaie warowik ota ni kapecinan!" Ki witam nohwe matci natowew wewerita tanta e ici kapecitcik.
Nehirowisiw ki ocitaw kekwariw mamo neriw ka ki makonat, ki itew : "kicpin witcihiiake kitci nanto nipahaiak matci natowewok, nama kir ki ka nipahitinan. Aric eka totamane, ki ka nipahitinan!" Ki sekimakaniwiw, ekoni ka ki iciwirowet neta witc matci natowewa ka ici tacikeritci.
