Exercices à partir de textes : Kice iriniw acitc matci awihawic
L’aîné et le méchant
Étudiez ce qui suit
Tout jouer Kice iriniw acitc matci awihawic
Kice iriniw acitc matci awihawic
Weckatc, pecotcik kete Wemotacik, tacikepan peikw kice iriniw. Naha tca kice iriniw matawisipan. Kackitapan kitci kikehatc awiriw e akosiritci. Peikwaw e kicikarik, ki pitakeckako matci awihawica. Koctakaniwipan tca ko. Ocimakaniwipan ko e wapamakaniwitc otenak e motetc. Kirika aric ni e micta ko matcimakosispan wetci ocimakaniwispan.
Nama wiskat pakitinakaniwipanak awacak kitci pamotetcik e tipiskarik. Kaskina mikiwamiskak petcikatepan e itwaniwok: "Kecpin kinec tacikeine orowitimik ke tipiskak, ki ka ni matceworikw matci awihawic."
Peikw tca ockinikicic nama tapwetamopan ni e itwaniwonik. Ekotca peikwaw e tipiskarik , e micta kicikacterik, kimotc ki orowiw. Wi wapatahiwew ni aka e koctatikosiritci nihi kice iriniwa ka micta koctakaniwiritci. Notcimik ki ici matcaw nac e takocik kice iriniwa omikiwamirik. Pekatc iti tetipackam niheriw mikiwamiriw e wawapatak.
Kek petam, otananik ka ici nanipowitc, kekociciriw e moteparinik. Ekoni e ici iti kiwekapowitc pekatc. Nama awiriw wapamew. Ekoci kiapatc iti matcaw e tetipackatc mikiwamik. Kiapatc petam niheriw ka ki petak anotc. Nama aci pameritam e iteritak namaiew na awik.
Kek wetci pe makonakaniwitc oskatik. Micta notakosiw e micta tca kiciwetc. Nac nama petakosiw osam e micta sekisitc. Tekaci nama kackitaw kitci matcitc e apitc sekisitc. Pakitiniko nitowatc anahweriw kice iriniwa ka ki makonikotc e tca itikotc: "Ekoci ocimo tecikotc epwamoci wiec totatan." Micta sikirehakaniwiw naha ockinikicic ni e itakaniwitc, ekoni e ici micta matcepatatc.
Kek keskat nakapataw e iteritak: "Kekwaritake wetci ki pe icitc?" Koski icaw nete. Pekatc iti motew aka kitci petowakaniwitc. Kimosamew nihi kice iriniwa. Nac iti petapaniw. Wapamew maka nihi kice iriniwa e taci matoritci. Ekoni e ici natawapamatc. Itew nihi kice iriniwa: "Nama ni nin ki koctitin. Kecpin mireritamane, matci ki ka ki witcihitin." Kanawapamew nihi awaca naha kice iriniw, tipickotc ockicikorik.
Nanake, aci iti tapwetowew kice iriniw nihi ockinikicica, Asperimototowew kitci witcihikotc. Atotew kitci natcipataritci mackikiwatikoriw. Witamowew tan e icinakonik kaie ite ke ici miskamiritci. Tapwe natcipataw naha ockinikicic aniheriw mackikiwatikoriw. Ka ickwa takocik aci kata mackikiwapokew kice iriniw.
Epwamoci tekaci sakasikeritci pisimwa, kitaparitaw niheriw mackikiwaporiw. Anahweriw tca matci awihawica ka ki pitakeckakospan, tepirak ko e tipiskarik kiskerimepan naha kice iriniw. Ka ickwa minikwetc mackikiwaporiw epwamoci kicikarik, ekoni e ki ocohwatc. Nama awocamec ki otci mamockatcihiko.
