Exercices à partir de textes : Awesisak ka kokwetciskatatcik
L’histoire conte la course des animaux.
Étudiez ce qui suit
Tout jouer Awesisak ka kokwetciskatatcik
Awesisak ka kokwetciskatatcik
Weckatc ki mawotcihitowok awesisak kitci kiskerimakaniwitc awin ka mawotci kicipatatc. Ki ocitawok masinahikaniw taci ke otci matcepatatcik kaie ke iti iticimonik meskanariw nac taci ke ici takocipatatcik. Itakaniwiw wapoc: "Kir ki ka nanakatisin wewerita kitci totcikatek, aka awik kitci weciketc:"
Aci tapwe orakapowiwok ke mipatatcik. Wakoc, mahikan, masko, piciw, nikikw, wapictan, amiskw, esipan kaie cikakw. Micta sa kotc mitcetiwok. Aci witcikatew kitci kitciparik. Aci tapwe matcepatawok aniki awesisak.
Kek wapatamok e wawakicimonik meskanariw, ekoni e ici kiskamepatatc anahwe mahikan. Wapamew wakoc anihi mahikana. Ekoni e ici keskinowapamatc e nosanehwatc. Kek kotakihik awesisak wapikewok, ekoni kaie wirawaw e ici nosanehiketcik.
Anahwe wapoc nama wapikew e wecimakaniwitc. Mekwata taci cikimew mikinakwa kitci kwetcihiweritci. Nama wi icaw anahwe mikinakw, e kiskeritak e micta niramisitc.
Aniki kotakihik awesisak mictahi kicipatawok. Kek itakaniwiw anahwe wapoc: "Aci ki micta nakatcipahikowin. Aci kekat kata pe takocipatawok." Aci kata matcepataw anahwe wapoc. Iti takocipataw taci e ici wawakicimonik. Tekaci wawakipataw e nosanetatc aniheriw meskanariw.
Kek takocipatawok aniki awesisak. Kekat kaskina tapickotc takocipatawok. Micta kanawapamitowok e itetcik: "Awin tca kirawe ka kicipatatc?" Nama tacikew anahwe ka nanakatisitc wapoc. Mekwata itanaho, ketin e nosanehiketc.
